Plantun de Prouvènço

Pèr coumpara dos planto d'encò nostre

Vulpia ciliata & Cuscuta planiflora

Vulpia ciliata

Poaceae Graminaceae

Nom en français : Vulpie ciliée.

Descripcioun :
Erbo que pòu faire fin qu'à 50 cm d'aut emé uno inflourejado de 5 à 20 cm, estrecho e en generau engueinado pèr la darriero fueio. Li lemma soun cihado (proun raramen sènso péu), souvènt peludo sus l'esquino, alor que la glumo a ges d'aresto. L'enflourejado devèn rouginasso emé l'age.Trachis dins li relarg secarous e li garrigo.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 50 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Vulpia
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 5 à 20 cm
Flourido : Printèms - Estiéu

Sòu : Ca (Si)
Autour basso e auto : 0 à 1200 m
Aparado : Noun

Liò : Tepiero seco - Garrigo
Estànci : Termoumediterran à Coulinen
Couroulougi : Eurimediterrano
Ref. sc. : Vulpia ciliata Dumort., 1824

Péu-de-lin(-di-flour-plano)

Cuscuta planiflora

Convolvulaceae

Àutri noum : Péu-de-lin, Péu-de-damo, Rasco, Barbo-de-mouine, Cuscuto.

Nom en français : Cuscute à fleur plane.

Descripcioun :
Lou péu-de-lin-di-flour-plano douno d'èr à Cuscuta epithymum, pamens li flour soun blanco e pu pichoto. Es uno planto coumuno en basso Prouvènço au contro de sa cousino que mounto mai. Se n'en destrìo subretout que li sepalo an de lobe redoun e pas pounchu. Bessai que s'agirié de la memo meno qu'eisisto de bastard.

Usanço :
Li péu-de-lin soun pas acampa au nostre. Caupon un glucoside, la cuscutino, qu'ajudo à caga e à secreta la bilo. La cuscuto de Chino, Cuscuta sinensis, èi vertuouso contro li proublèmo de proustato e d'ourmono encò lis ome o li femo. Se chabis en gelulo dins lou coumèrci. Tant se poudrié que siegue parié pèr li nostre.